SAN ANTONIO DE PADUA

SAN ANTONIO DE PADUA (Traducido al benasqués)

Ba naixé a Lisboa y se ba di Fernando hasta els bentigüeit ans.Els suyos pays, Teresa Tabera y Martín Bullón le ban doná una educasión mol cristiana.

Cuan estabe a Coimbra ba bere arribá allí als sinc primès mártirs fransiscanos, que hèben moríu a Marruecos. Alló el ba acabá d´animá ta corré al conbento fransiscano y demaná entra a ixa orden. Tenibe 25 ans. El ban nimbiá a Maruecos, coma éll hèbe demanáu, pero se ba posá malo y ba tínre que torná. Una tronada ba arrastrá el suyo barco hasta Sisilia y allí ba desembarcá, entrán  al conbento fransiscano y bibín coma un frari mès. Un día el ba sentí predicá San Fransisco y le ba fè tanto goy que le ba demaná qu´amostrase Teolochía als fraris. Ba predicá deu ans per Italia y per Fransa, fèn moltos milagros. El día 13 de chunio del an 1231, dan les palabres "ya beigo a Dios", se ba despedí bolán ta l´ eternidat.

GOZOS DE SAN ANTONIO DE PADUA (Traducidos al benasqués)

Al conbento de Padua

dito de Santa María,

els fraris de San Fransisco

la tumba de San Antonio

allí cuiden nit y día.

Yei uns lirios y un rosal

algúns moixonéts que canten,

y quillades a unes pèdres

crémen unes bèles bllánques.

Disen que sállen del aire

fragansies de fantasía,

y que per la nit els anchels

baixen a fèle bisita,

y que sels mire la lluna

amostrán la cara bllanca,

mientras cay sobre la yerba

una rosada bendita.

Tanto disen, disen tanto,

que Padua ye alterada,

perque biene molta chen

ta que les bendigue el santo.

Bienen els hòmes y dònes

mols carcamáls y cansáus,

biudes sòles y bensedes

malos dan moltos dolós,

desheredáus de la tèrra

y de la bida pecadós,

chen que demane llimosna

coixos, siegos, bebedós.

Disen que se donen grasies

tantes a Santa María,

que pllóren els pecadós

y allí torne l´ alegría,

les biudes bisten de gala

els coixos pueden ballá,

els siegos ya pueden bere

y els mudos pueden charrá.

Y conten que Fray Antonio

enterráu a Santa María,

está repartín ya muerto

lo que no ba podé en vida,

y puede nimbiá tal sielo

al que de berdat le hu pida.

La chen ye tan alterada

y de Padua conten tanto,

queren molto a fray Antonio

y ya el consideren santo.

Ye el abogáu dels mès pobres

llusèro dels que no beden,

corasón dels que mès sufren

sobre la tumba le canten,

els moixóns de l´ alegría

demanán per tots nusaltros

en la muerte y en la bida.

A Padua mos recòrden

de fray Antonio birtúts,

y tans sermóns y enseñanses

que ya el consideren santo,

y disen que tanto alcanse

que pague el sielo en milagros

tot lo que al resá se gasten.

La chen mès pobre procllame

la santidat consumada,

y la noblesa y el clero

coma la chen quere santo,

y Dios otorgue mòltes grasies

ya no posen cap de pero.

Jacobo Conrado el bispe

ye mol deboto del frari,

pronto la causa comense

t´ exámen de santidat,

arriben papès a Roma

dan moltes firmes y cartes,

asegurán els milagros

fètos per moltes siudáts.

Gregorio IX, el Papa,

estudie molto ista causa,

Juan y Jordano maestros

y abades de San Benito,

comproben causa y proseso

y trobangüe tot conforme,

nimbien a Roma l´ instansia

y disen que fray Antonio

ye santo de buena talla.

Y yei cardenáls a Roma

que discuten y comenten,

que les prises no maduren

el fruto que ye a la rama.

Del mil dosens treinta y dos

ya correbe el día trenta,

cuan a Espoleto se trobe

Gregorio IX, el Papa,

y lluse el sol als llináus

a les torres brille l´ alba,

y ya toquen les campanes

la Catedral d´ Espoleto

ya biste les millós gales.

Se díu la Misa Papal

dan ornamentos de pllata,

y les ulós del insienso

s´ estenen a tota la chen,

armonía gregoriana

fan la música y el coro,

biene un profundo silensio

cuan el Papa díu el cánon,

y a fray Antonio per santo

nomine, inboque y procllame

may la chen ha plloráu tanto.

Un tedeum cante el coro

toquen a gloria campanes,

y arrodillada la chen

a San Antonio de Padua,

de petisións y orasións

pòsen el aire calén.

-----