LA BALL DE BENÁS IXUPLLIDADA
Buen preu ya ben pagá
al fèmos els pantanos
y els túnels y sentráls,
perdén les millós tèrres
istos llugás chermanos
dixán les escombrères.
Tota la llum sen lleben
cara a la tèrra pllana
tals túnels ni mon quede.
¿Per qué els túnels sin llum?
¿Esperen, tal begada,
que yeigue un choquetaso
y pase una animalada?.
Si l´ aigua fa la llum
a totes les sentráls,
¿No ye mol traisionèro
que se les lleben tota
sin dixane tals túnels
que no sey bede gota?.
Así tením montañes
que son mol bibitades,
cuan uno se fa mal
per cáire u torsedura,
tota la chen al tanto
que no les falte achuda.
Y tinrá un helicóptero
ta llebalo a hospital,
y ben pronto curalo
si tiene guaire mal.
¿Per qué al posase malo
un hòme a un llugaret,
ya no yei helicóptero
fágue buen temps u fret?.
Solo dan cuatre ruedes
anirá al hospital,
tálmente ya no arribe
pero tot done igual,
trámpis, pati t´ otro
y les perese normal.
¡Ixes son les lleys
que mos aplliquen!.
¡Ixa ye la igualdat
que tanto prediquen!.
Al pasá pels congustros
de tot el Bentamillo,
cayén pèdres y tèrra
y llitarrades de néu,
si non pase de gordes
ye perque Deu no quere,
els Anchels de la Guarda
treballen nit y día
ta que no cháfen coches
dallán alguna bida.
Ixa carretereta
ye un camino de crábes,
cuan te cruses dan otro
a pocos puestos cabes.
¿Per qué no fan un túnel
desde Seira hasya el Run?.
Dixán t´ ecologistes
la carretèra d´ ara,
y tals demés la nueba
mès ampllia y ben trasada.
¿Per qué no fan bisères
puyán tal Hospital,
y així les llitarrades
ya no faríen mal?.
Ixo túnel ta Fransa
¿Es que may se fará?.
Cataláns a la dreta
non fan buenes ragóns,
tal costáu suyo queren
que baiguen els millóns;
y tenín a l´ esquèrre
ixo nuebo llugá,
el de les dos mentires
may mos achudará.
La distansia mès curta
Saragosa-Toulousse
per Benás pasaríe,
sin puyá cap de puerto
tot asó cambiaríe,
hasta l´ aire de puerto
mès conten dormiríe.
El patuès ya la lluenga
de la Ball de Benás,
ista lluenga bernácula
charren trenta llugás.
No hem de dixá que puyen
a trafucá el patuès,
dan òtres mesclles rares
qu´ algúns han inbentáu
posán tot del rebès.
Querím la nuestra lluenga
la de tota la bida,
y yei que defendela
tenínla ben chuñida.
Queren fè una Academia
de lluenga aragonèsa,
y aixó puede se bueno
si fan les còses be,
pero yo les pregunto,
¿Qué será del patuès?.
¿Sabrán tálmente dale
algún trato espesial,
coma els cataláns tienen
allá a la Ball d´Arán?.
Si ta la nueva lluenga
queríts buens alaséts,
no faguéts mala mesclla
posat molto patuès.
Ta que ixa casa dure
y pase be els ibèrts,
t´ una milló estructura
posátye buen patuès.
Un llináu sin gotères
tinrá l´ aragonès,
si la llosa y les taches
son tamé del patuès.
-------
Jose Sanmartín Sopena
No hay comentarios:
Publicar un comentario