PUYÁ AL GALLINÈRO
La dula d´Estós yère a Ardonès ta mitat del més d´ Agosto de 1959. Els guardiáns d´ aquell an yèren Chusepmaria de casa Poca de Sarllè, Tonet un homenet chibudet de Suera que hèbe fèto mols ans de baquèro a la montaña de Grist y Chusep de casa Chironi de Benás, que yère el mès chobe y fèbe d´ achudán.
Ben pasá mol buen berano perque els tres yèren chobes, mos llebaben mol be y no teniben galbana ta crusá les montañes.
Una nit, dispués de sopá, ben desidí que hèben de puyá al Gallinèro y que u faríen denit, ta no dixá el bestiá solo de día.
Seríen les nou d la nit cuan els tres guardiáns ben sállre de la cabana d´ Ardonès cara tal Ampríu y tal Gallinèro. Fèbe buena nit y la Lluna yère a cuarto creixen, allumbrabe algo pero foteríen moltes entrapusades puyán al pico.
Ben caminá per agón ye hara fèta la pista forestal. Crusán el barranco y el Ubago hasta arribá a la bista del Ampríu. A les deu de la nit ben arriba a la cabana dl Ampríu.
Allí mos ben pará una estona ta charrá dan Miguel de casa Paulica de Benás y Fernando (el crabéro), el dos yèren guardiáns de la dula de mules que ixo an yèbe al Ampríu.
Paulica yère més gran que nusaltros y cuan le be dí qu´ anaben tal Gallinèro se ba posá mol enfadáu:
¡No anéts al Gallinèro denit!. ¡Quedatos así hasta fèse de día!. ¡Anaye denit ye una llocura y podéts pénre mal!.
Paulica tenibe molta ragón pero no len ben fè ni caso y ben apretá els tres cara tal Gallinèro.
No llebaben mès que el tocho y un morralet dan una boteta chicorrona dan mich litro de bino.
La puyada desde l´ Ampríu al Gallinèro engañabe molto. T´ arribá a la colladeta ya mos hèben foteu una buena sudada y encara quedabe lo pió.
Dispués de mols entrapusóns seríen les dotxe de la nit cuan ben arribá a la crencha del pico Gallinèro. Allí mos ben está una micha hora.
Hèben sentíu di que en un día sin boires se podeben bedé desde Gallinèro les torres del Pilá de Saragosa. Nusaltros al se denit no podeben bere mès que les lllums dels llugás y mès u menos podeben ensopegá els llugás que mès coneixeben, desde Benás hasta Lespaúls.
Ben pode contá les llums de sesenta y sinc llugás.
Se díu que la Ball de Benás ye guardada per sies pics, que son Aneto, Perdiguèro, Poséts, Cotiella, Turbón y Gallinèro.
Aquèll día hèben puyáu uno dels pics que yèren guardiáns de la Ball de Benás, estaben prou contens y coma ya hèben puyáu antes al Perdiguèro ya en teniben dos a la pocha. Pronto seríen mès.
----------
José Sanmartín Sopena
No hay comentarios:
Publicar un comentario