ELS BROIXOS
Yo be naixé a Lespaúls
y cuan cruso Coll de Fàdes,
ya me puede la emosión
y me tremòlen les cames.
Tantes còses se contaben
cuan se fèben collasións,
que la po no mos faltabe
als que yèren chicorróns.
Charraben dels hòmes broixos
que marchaben per la nit,
s´amagaben per els buixos
y salliben fotén grits.
Els hòmes broixos anaben
a un cruse de sèt camíns,
ta discutí se sentaben
repartínse les fayenes;
donán mal a tota reu
ta fè buena po a la chen,
y cuan u hèben comprenéu
salliben d´ allí corrén.
Teniben uns diaplluríns
ficáus a un tubet de caña,
que llebaben a la pócha
ben tancáu y siempre a man;
cuan queriben enpllegalos
els soltaben aplleret,
les manaben les fayenes
y aunque fèse molto fret,
aquells displluríns credeben
y fèben òbres mol grans
aprisa coma el llampit,
y no se cansaben may
ni de día ni de nit.
Conten que en solo una nit
podeben dallá la yerba
d´ un práu de trenta chornáls,
y dixá les bargues fètes
habénye yerba a puyáls.
Otros disen habé bisto
segá bláu de campos grans,
dixán les feixines fètes
a mès de quinse bancáls,
y tot d´ un día tal altro
sin chen ta posaye mans.
Tamè yèbe dònes broixes
per aquélla redolada,
coma la chen se u credebe
se fèbe la animalada;
a mès d´ una pobre dòna
la ban fè morí cremada,
sin está broixa ni rès
ni tínre culpa de nada.
Les broixes bolaben molto
a cabáll d´ una buixeta,
chillaben coma les grálles
ta les nits de Lluna Pllena;
y cuan baixaben a tèrra
se tornaben nègros gats,
y entraben a algunes càses
ficánse per els llináts.
Tamé cuan la Lluna Pllena
anaben ta Turbinè,
allí les creixeben àles
y bolaben tal Turbón,
aixó contaben els yayos
son còses del altro mon.
Yèren temps de Inquisisión
la chen estabe espantada,
cuan estorbabe una dòna
y per broixa se le dabe,
en Consell de Lespaúls
ben pronto la condenabe
ta que morise cremada;
si yèren moltes les broixes
hèben de morí aforcades,
chusto a la pllasa mès gran,
ta que la chen u bedese
y u recordase mols ans.
Ixa po de la chen pobre
els tenibe ben calláts,
treballán tals rics de día
y per la nit encamáts,
no yèbe radio ni tele
beniben fills a ramáts.
---------
José Sanmartín Sopena
No hay comentarios:
Publicar un comentario