SAN ANTÓN
Tal dechiset de chinèro
ye el día de San Antón,
sentirèm misa primèro
néu y turbères ya i son.
L´ ermita de San Antón
ye a l´ entrada de Benás,
sin crusá el puen, a la esquèrra,
ben pronto la trobarás.
A mesdía el capellán
güe mos dirá allí la misa
y bendesirá als animáls,
als de dos y cuatre pates,
y fuirèm d´ allí deprisa,
perque anit mos ba nebá
mès d´ un palmo pels llináts,
pero s´ han cheráu turbères
y no se tienen ni els gats
caminán per les asères.
Per tota la Ribagorsa
se selebren "els barbùts"
dan alegría y dan fòrsa,
San Bictorián el primèro
San Antón dan el llitón,
San Sebastián de chinèro
y San Blas els cuatre son.
A casi tots els llugás
se fan foguères mol grans,
ta minchá trúnfes colgades
dan chulles y llonganisa
y la bota ta regales.
A Graus se fan "La Pllega"
demanán pèrres a tots,
serán ta la Cofraría
qu´ allí tiene San Antón;
te darán "el cordonet"
ta llebalo tot el an,
pencháu de la tafarreta
ta tenilo ben a man.
Ixo cordonet bendito
ature de les tronades,
y coma ya les he dito
pencháu de la tafarreta
pare el rayos y sentelles,
ni les males pedregades
te porán matá les güélles.
A Chistáu fan esquèllades
chuntos els chicóts y grans,
dan les urèlles chelades
y la moquita baixán;
no paren de recorrese
esquèlles y trucs sonán
a les canáules de freixe,
Gistaín, San Chuán y Plan;
y farán chocolatada
cuan se callen les esquèlles
al final de la billada.
------
No hay comentarios:
Publicar un comentario