CUAN CHÁRREN LES CAMPANES
A la Bila de Benás y a mols otros llugás de la Ribagorsa, la chen coneixe be la lluenga que chárren les campanes.
L´ Illesia Parroquial de Santa María y San Marsial de Benás tiene un campanal cuadráu, dan sies bentabáls: dos chicóts cara ta Sarllè, uno gran cara ta Fransa, otro gran cara ta Chía y el més gran de tots cara tal Mon.
Ta Cuan la Guèrra Sibíl, sen ban llebá les campanes ta fundiles y fène munisións. Algún yayos del llugá encara recorden com les ban tirá del campanal a tèrra, disen que la mès gran ba fè un foráu
que y cabebe un hòme, ba cáire chusto debán de la puerta que yei ta puyá al campanal.
Uns ans dispués d´ acaba la guèrra se ban torná a comprá y posá les dos campanes grans y una de
les chicotes, l´ altra chicota no se len hèben llebáu. El bentanal de la campana mès gran ba quedá
buedo mols ans. El llugá queribe recuperá ixa campana y entre el Achuntamén, la Cofraría de San Marsial y algúns besins que ban doná pèrres, ban podé reuní 28000 euros ta pagá la campana y la ban posá el día 13 de Mayo del 2007. Yère Alcalde de Benás Ignasio Abadía.
Aixi que, al campanal de Benás tenim ara istes campanes:
La Campana de la Bila, campana gran, que ye mirán ta Fransa.
La Campana Sebastiana, campana gran, que ye mirán ta Chía.
Les Campanetes dels Ancheléts, dos campanetes chicotes que son mirán ta Sarllè.
La Campana Marsiala, la mès gran, que ye mirán tal Mon.
Se coneixen hasta dotxe manères de tocá les campanes
1)Toque dels Ancheléts u del Gononín: Istes dos campanetes se tocaben cuan se moribe algún nen u nena chicóts. Tamé se tocaben cuan se fèben els bautisos.
2)Toque de muerts: Se tocabe el Día dels Difuntos per la nit. Tamé se tocabe cuan se moribe algún besino de la bila. Tocaben tres begades: ta abisá de que alguno hèbe muerto, ta cuan comensabe la misa t´aná a despedilo y cuan se llebabe al sagrèro.
3)Toque de fiesta:Se baldiaben totes les campanes de begada. Yèren les fiestes grans a Benás:
San Sebastián, el 20 d´ Enero, fiesta dels chicóts.
San Marsial, el 30 de Chunio, fiesta dels mosos.
La Birgen d´Agosto, día 15, fiesta dels casáus.
Tamé se baldiaben cuan yèren òtres fiestes religioses.
4)Toque de misa: Yei tres toques, primèro, segundo y tersèro, que abisen que la misa ba a comensá.
5)Toque de moribundos: Abisabe que s´ anabe a llebá la Extremaunsión a un besino que s´estabe ya morín. Anaben capellán y monaguillo a casa del que se moribe. La chen que sels crusabe per la carrèra se santigüabe.
6)Toque de mal temps: Se repicaben les campanes mol fòrt y la chen sabebe que benibe una tronada u pedregada que en podebe fè de gordes. Tots anaben a l´ Illesia y se posaben a resá ta així aturá el mal temps. Yèbe santos als que se resabe de manèra espesial t´ aturá de les tronades. Al llugá de Lespaúls, barrio de Villapllana, se resabe a San Chinès y may arribaben les tronades males que se formaben al Turbón. Yère una talla románica que tamé ba desaparesé, coma ha pasáu dan sens de òbres de la Ribagorsa, tálmente cara t´ agón son les altres 113 òbres que no queren torná.
7)Toque de foc: Abisabe a la chen de que yèbe foc. Yère oblligáu aná aprisa dan forrádes t´achudá a amortalo. No soleben anaye yayos y chicóts.
8)Toque del Ángelus: Se fèbe a les l2 del maitino.
9)Toque del alba: Yère a les 6 del maitino tal berano y a les 8 del maitino en ibèrt.
10)Toque de Rosari: Per les tardis, abisabe que comensabe el rosari.
11)Toque de Gloria: Se fèbe el Sapte Santo.
12)Toque t´aná a besinal: Tots els besinos, menos yayos y chicóts, hèben d´ aná ta la pllasa y el Alcalde manabe lo que yèbe que fè.
Podebe se que yèse amenasa de riada y yèbe qu´ aná al Cabo la Bila a posaye sacos de arena ta que el río no entrase a Benás.
Podebe se que alguno s´ hèse perdeu y yèbe que fè còlles ta análo a buscá. Recordo que cuan yo anabe a l´ escuela de Benás, se ba perdé una dòna y la ban está buscán tres díes. Ba aparesé dichós de les rámes d´ un abet mol gran.
La manèra de toca les campanes tamé ha cambiáu molto, antes se fèbe a man, yèbe campanèros
que s´ encargaben d´ aixó. Ara yei ya campanes que se fan tocá sin puyá al campanal.
-------
JJSS
No hay comentarios:
Publicar un comentario