ELS CARNABÁLS PERDEUS
Antes del siglo XX, la chen dels llugás se dibertiben molto cuan arribaben els Carnabáls. Tal siglo XX, ixes costumbres ban aná desaparesen.Les autoridáts dels llugás: Alcalde, Capellán, Sibíls, no bedeben be alló y poc a poc se ban aná amortán els Carnabáls.
Tals Carnabáls la chen fèbe, mès u menos, coma fan ara els chóbes dan "el botellón" pero mès a lo bruto.
Les còses no yèren igual a tots els llugás, pero yei costumbres que si que aparesen a casi tots.
Istes son algunes de les còses que se fèben tals Carnabáls:
1)S´ embadurnaben les cares dan carbón y així podeben fè mès l´ animal, perque la chen no podebe coneixelos.
2)El hòmes se bestiben de dònes, les dònes se bestiben d´ hòmes. D´ ixa manèra anaben al baile y
coma la chen yère tan confundida, pensaben que ballaben dan una dòna y resultabe que yère hòme.
Tot lo que pasabe al baile se contabe dispués per les carrères y la chen se fèbe rises tot el an.
3)Fèbe de Rey del Carnabal un ninot fèto de palla, bestíu dan trapos , paresebe un espantamoixóns.
El penchaben a un puntal a la pllasa y presidibe les fiestes. El saguer día de Carnabal se cremabe el ninot a la hora de sopá y ya comensabe la Cuaresma.
4)Algúns chobenastros ya disfrasáts, s´ escabulliben del baile y se ficaben a les cases ta prenese llonganises, chorisos, u pernílls dels rebosts. A alguna pobre dòna se len ban llebá hasta la òlla del foc. Dan tot lo que rapiñaben se fèben una buena lifara.
5)Les dònes soltères y algunes casades chóbes, si pillaben algún chobenastro u tión despistáu, el ficaben a un pallèro y "le contaben les bieges". L´ hòme quedabe ben escarmentáu y may mès se dixaríe pillá per les dònes cuan tornasen els Carnabáls.
6)Els hòmes montaben el ninot a un burro y recorreben les carrères del llugá paránse a cada casa ta fè "la plléga". Demanaben a la chen butifarres, chorisos, llonganises, ous y trúnfes. Dan tot lo que repllegaben se fèben un buen sopá. Dispués de sopá anaben a les cases de les dónes ta inbitales a que anasen al baile. Yei otros llugás agón yèren les dònes les que se fèben "plléga" y sopá.
7)Se solebe fè el "ball del óso". El balladó prinsipal anabe bestíu dan la pèll d´ un óso y caminabe y se bochabe coma si fuese óso de berdat. Isto ball s´ acababe cuan cayebe a tèrra ya benseu.
Recordabe isto ball, els altros temps, cuan els hòmes casaben òsos y se guardaben la pèll ta podé aná mès abrigáts cuan fèse fret.
8)Cuan bedeben a alguno treballán els díes dels Carnabáls anaben a buscalo ta oblligalo a dixá de treballá. El fèben caminá ta la taberna y allí hèbe d´ pagá el bino ta que bebesen tots.
--------
JJSS
No hay comentarios:
Publicar un comentario