EL CRABÈRO DE LA BILA DE BENÁS
Tal an 1950 a la Bila de Benás yèbe crabèro. Fèbe ixo treball Tono, de Casa Fernando, que en gloria estigue, perque al comensá la primabèra d´ isto an 2012 mos ba dixá. Ara mos estará bedén a tots desde lo més altèro del sielo. Buena persona, de berdat, yère Tono.
En aquèlls temps a les cáses pòbres de Benás yèbe una u dos crábes. Yèren les baques dels pòbres.
Les crábes yèbe que llebales demaitino a la pllasa y allí el crabèro les repllegabe y les anabe a soltá a La Cuesta, al Braquisal u als Sacs. Le achudabe un canet mol espabiláu.
Per la tardi el crabèro fèbe baixá la crabada hasta el Cabo la Bila, chusto agón comensa la seclla de Molinèro. Allí soleben aná els chicóts de cada casa ta triase les suyes crábes. No pasabe rès si alguno dels chicóts ixupllidagüe análes a buscá. Les crábes sabeben torná soles ta la suya casa y al arribá se les donabe algún bisiet t´ amalbiales.
Als llugás chicóts de la Ribagorsa el crabèro solebe aná a minchá un día a cada casa per crába.
Si a una casa yèbe una crába anabe a minchaye un día, si yèbe dos crábes dos díes. Cuan acababe totes les cáses tornabe a comensá per la priméra.
Que el crabèro anase a minchá a una casa yère casi coma una fiesta. Contabe moltes leyendes, histories y cuentos que escultaben conténs els mès chicóts.
La Bila de Benás yère masa gran ta que el crabèro anase a minchá a cada casa, així que se le pagabe un tanto per cada crába y éll se fèbe el gasto.
A Benás yèbe unes 400 crábes. Yo hu recordo perque anabe a les escueles de Benás, yère de una casa pòbre, tàlmente de la mès pòbre del llugá, y anabe a buscá la crába que teniben.
Tínre crábes yère presiso ta les càses pòbres. Teniben la llèt cada día y la carne dels crabidéts u les pèrres si preferiben benéselos.
A les càses michanes y riques no les calebe crábes, perque teniben baques.
Tots sabem que les crábes llimpien els boscarráls, perque se minchen les barses, arañóns y òtres mates cuan están sallín. Ara a Benás no yei crábes y tot ye puerco, plleno de rames, barses y mates.
Si yei foc, arderá tot coma la tieda.
-------
JJSS
No hay comentarios:
Publicar un comentario